Kaychawmi willakuyan imanawpis unaypita kay hirkantsikkunachaw yaku iñishishqantsikta, manaraq españolkuna chaayaamunqanchaw. Qatin yakutam, lamarpita rahu hirkakunakama, qichwa markakunaman chaarir kutin lamarman. Kaychawmi willakun chunka pitsqa watachaw kay yachakuykuna ashikashqanta, yaku purinqanta, nunakunapa yarpayninchaw imapis yaku kashqanta. Arqueólogo Alex Herrera, Cambridge Universidadchaw (Reino Unido) Doctor tikrashqa, Universidad de los Andeschaw yachatsikuq (Colombia) rikaatsimantsik amaakunata, ushnukunata, imanawpis unay nunakuna parqukuyanqanta, patakkunata, qaqakunachaw imatapis llushiyahsqanta. Niykur hina willamantsik Kunchukuschaw, Huaylaschawpis hirkakunapaq unay willakuykunata tsaychaw kay markakuna imanawpis tinkuyanqanta. Kaykunata willamantsik chunka waranqa watakuna qipaman rikashqa. Itsa pay yarpachakun imanawpis tsay watakunachaw llapan kashqanta, españolkuna mana alli rurashqanta, hirka nunakuna españolkunapa munaynin rurayanqanta.
Tsaypaq hirka nunakunawan rimakushqanta grabashqa, tsaychaw yaku pishinqanta, chakrakuna tsakishqanta nunakuna willakuyan, tsaywan yarpachakuntsik shamuq watakunapaq. Tsay uryakunachawmi nunakunapa yachawninta ashiyashqa. Pututukuna imapaqpis alli kashqanta, waqaynin hirkakunachaw imapaqpis kashqanta. Tsaynawmi kay puriy ashiy, waranqa isqun pachak isqun chunka pitsqa watachaw qallarqan. Itsa tsay watakuncahw kaqkunata ishkay waranqa, ishkay waranqa chuncka ishkay watachaw taraisqakunatawan tinkuratsir tarintsik huk laaya yachaykunata, waqta nunakunapa rikayninkunapita kikintsikpa yarpachakuynintsikkunawa.